Разважанні з Божым Словам

    Рэакцыя габрэяў зусім не пасавала да выказвання Езуса, які паведамiў пра тое, што нарэшце споўнілася доўгае чаканне пакаленняў выбранага народу Месіі. Яны падняліся са сваіх месцаў і, поўныя гневу, хацелі скінуць Езуса з абрыва. Нават словы пра тое, што ні адзін прарок – не жаданы госць ва ўласнай Айчыне, не вельмі падыходзяць да гэтай сітуацыі. Езус сустрэўся не толькі з неразуменнем, але і з варожасцю, якая межавала з нянавісцю.
    Сцэна з назарэтанскай сінагогі стала вельмі тыповай для сустрэчаў чалавека з Хрыстом. Збавіцель прыносіць сваёй Асобай выкананне самых патаемных людскіх жаданняў: каб усе былі свабодныя, але ніколі не страчвалі надзеі, каб ніхто не цярпеў з-за якой-небудзь хваробы ці калецтва, каб усе радаваліся прыязнасцю Бога-Творцы. Што можна яшчэ больш чакаць? Якое яшчэ жаданне можа задаволіць чалавека? У рэакцыі землякоў Езуса мы знаходзім адказ. Бог сустракае цяжкасці, калі Ён захоча сваім Божым спосабам выканаць свае абяцанні. Так было пры жыцці Езуса і аналагічная сітуацыя паўтараецца на працягу вякоў. Не здзіўляйцеся, што і ў наш час Асоба Хрыста сустракае заўзятых ворагаў. І сёння свет паўтарае за жыхарамі Назарэту: так, давайце зробім чалавека шчаслівым і свабодным, але паводле нашых уяўленняў і планаў. І таму прапановы Бога – непажаданыя для чалавека. Аднойчы Езус растлумачыць гэта простым выказваннем, што Яго думкі і шляхі – не думкі і шляхі чалавека.
    Аднак Божыя планы збаўлення былі рэалізаваны, нягледзячы на неразуменне і варожасць, бо яны былі Божымі планамі! Нашае заданне – прачытаць іх і прыняць, нават, калі яны не заўсёды супадаюць з нашымі чаканнямі.

Кс. Яраслаў Грынашкевіч

< Папярэдняя		Наступная >