Цяпер наш позірк мы накіроўваем у бок найбліжэйшых Сусветных дзён моладзі, што адбудуцца ў жніўні 2011 г. у Мадрыдзе. Ужо ў 1989 г. за некалькі месяцаў перад гістарычным падзеннем бярлінскага мура пілігрымка маладых затрымалася ў Іспаніі, у Сантьяго дэ Кампастэла. Цяпер, калі асабліва Еўропе патрэбна знайсці свае хрысціянскія карані, мы павінны сустрэцца ў Мадрыдзе. Дэвіз сустрэчы: “Укарэненыя і ўбудаваныя ў Хрысце, і ўзмоцненыя ў веры” (пар. Клс 2, 7).

    Таму, дарагія сябры, я запрашаю Вас паглыбіць Вашую веру ў Бога, нашага Айца, Езуса Хрыста. Вы з’яўляецеся будучыняй грамадства і Касцёла! Як пісаў апостал Павел да хрысціянаў-каласянаў, жыватворным з’яўляецца тое, каб мець карані, трывалыя фундаменты! І гэта становіцца актуальным асабліва сёння, калі ў многіх няма трывалых пунктаў адліку, на чым можна было б збудаваць сваё жыццё, з-за чаго ўзнікае пачуццё глыбокай няпэўнасці. †

    Дарагія сябры! Яшчэ раз я запрашаю Вас прыняць удзел у Сусветных днях моладзі ў Мадрыдзе. З глыбокай радасцю я чакаю асабіста кожнага з Вас: Езус хоча зрабіць Вас моцнымі ў веры цераз Касцёл. Рашэнне паверыць у Езуса Хрыста і пайсці за Ім, не з’яўляецца лёгкім. А перашкаджаюць яму нашыя асабістыя нявернасці, а таксама шматлікія галасы, што ўказваюць нам лягчэйшыя шляхі. Аднак не дайце адбіць у сабе ахвоту. Шукайце падтрымкі ў хрысціянскай супольнасці, у Касцёле!

    На працягу надыходзячага года падрыхтуйцеся старанна да сустрэчы ў Мадрыдзе разам з вашымі біскупамі, ксяндзамі і адказнымі за душпастырства моладзі ў дыяцэзіях, парафіяльных супольнасцях, таварыствах і рухах. Якасць нашай сустрэчы будзе залежыць перш за ўсё ад духоўнай падрыхтоўкі, малітвы, праслуханага разам Божага слова і ўзаемападтрымкі.