4 красавіка госцем нашай рэдакцыі быў ксёндз Віталій Дабраловіч, дырэктар “Карытас” Гродзенскай дыяцэзіі. Прапануем самыя цікавыя пытанні, якія былі зададзены ў гэты дзень, а таксама адказы кс. дырэктара.

- Паважаны кс. Віталій, сёння Вы зазірнулі да нас у рэдакцыю, каб адказаць на пытанні, якія непакояць многіх людзей, трапіўшых у цяжкую сітуацыю і патрабуючых дапамогі, а таксама тых, хто хацеў бы далучыцца да гэтай дапамогі. З якім настроем Вы сёння прыйшлі?
    Рэдакцыя
    - Напэўна, я змагу адказаць не на кожнае пытанне, але прыкладу ўсе намаганні, каб мае адказы маглі дапамагчы людзям здабыць матэрыяльныя сродкі і аб’яднацца ў супольнай справе дабрачыннай дзейнасці. Пастараюся таксама дапамагчы парадай.

    - Скажыце, калі ласка, як даўно ў Беларусі існуе “Карытас”?
    Рэдакцыя
    - Касцёл вядзе дабрачынную дзейнасць ужо 20 гадоў, а з 1994 года “Дабрачыннае каталіцкае таварыства “Карытас” Гродзенскай дыяцэзіі атрымала юрыдычную рэгістрацыю як рэлігійная місія. †

    - Я маці траіх дзяцей. Якім чынам я магу атрымаць дапамогу?
    Ганна, Гродна
    - Каб атрымаць дапамогу, трэба мець пры сабе наступныя дакументы: спраўку аб складзе сям’і, спраўкі аб даходах сям’і, пашпарт і заяву, у якой Вы звяртаецеся з просьбай аб дапамозе.

    - Хто мае права атрымаць ад Вас дапамогу?
    Станіслаў, Ліда
    - Да нас можа звярнуцца кожная сям’я, якая мае статус мнагадзетнай, а таксама інваліды, самотныя, старэйшыя людзі і тыя, у каго даход на адну асобу ў сям’і складае менш за 330 000 беларускіх рублёў. Гэта на сённяшні дзень.

    - Як вам дапамагае дзяржава і ці наогул дапамагае?
    Марына, Воранава
    - Цікавае пытанне. Калі казаць канкрэтна аб фінансавай дапамозе, то дзяржава не дапамагае, бо вядома, што яе бюджэт не такі вялікі, каб выдзяляць сродкі на дзейнасць недзяржаўных арганізацый. Да таго ж наша заканадаўства не мае распрацовак ў гэтым напрамку. Аднак хачу адзначыць, што калі дзяржаўныя структуры маюць такую магчымасць, то дапамагаюць. І вельмі важным з’яўляецца тое, што яны заўсёды адкрыты на дапамогу ў рашэнні многіх бюракратычных спраў. Гэта аблвыканкам і райвыканкамы.

    - Адкуль у Вас сродкі на дзейнасць?
    Кацярына, Гродна
    - Пытанне, якое цікавіць многіх. У першую чаргу трэба шчыра падзякаваць нашым вернікам, бо найбольшую частку дапамогі аказвае сам Касцёл. На працягу года ёсць пэўныя дні, калі вернікі збіраюць фінансавыя сродкі на дзейнасць “Карытас”. Ёсць і замежная дапамога рознымі матэрыяльнымі сродкамі, якая пасля накіроўваецца ў парафіі, сацыяльныя цэнтры, інтэрнаты, бальніцы і ўсюды, дзе патрабуюць дапамогі.

    - З якімі краінамі Вы супрацоўнічаеце?
    Кацярына, Гродна
    - На сённяшні дзень - з Аўстрыяй, Германіяй, Польшчай. Стараемся наладзіць супрацоўніцтва з Чэхіяй і Літвой, а таксама з іншымі краінамі.

    - Ці дапамагаюць Вам мясцовыя фірмы?
    Павел, Мінск
    - Так, у меру іх магчымасцяў. Але як я ўжо адзначыў, наша заканадаўства не вельмі спрыяе заахвочванню да дабрачыннасці нашых фірм і арганізацый. Але мы спадзяёмся, што ў будучым гэта зменіцца. Дыскусіі над новым заканадаўчым праектам у гэтай галіне дзейнасці вядуцца даўно. Мы только можам перадаць свае пажаданні і заўвагі, але апрацаванне і прыняцце такіх законаў належыць да пэўных дзяржаўных структур.

    - Добры дзень, я інвалід 2 групы, маю невялікую пенсію, але шмат грошай прыходзіцца аддаваць на лекі. Даведаўся, што ў Вас ёсць магчымасць атрымаць дапамогу лекамі. Калі так, то якія гэта лекі і хто іх можа атрымаць?
    Kaзімір, Ашмяны
    - Так, у нас можна атрымаць асноўныя лекі, але мы не з’яўляемся аптэкай у поўным разуменні гэтага слова. Таму мы маем толькі тое, што можна купіць у аптэках без рэцэптаў. Аднак мы патрабуем рэцэпт і пасведчанне інваліда.

    - Калісьці ў Вас можна было атрымаць памперсы для дарослых. Цяпер адказваюць, што іх няма, і гэта ўжо даўно. Але ведаю, што некаторыя і сёння іх атрымліваюць. Растлумачце, калі ласка, гэтую сітуацыю.
    Maрыя, Гродна
    - Сапраўды, памперсаў няма ў той колькасці, як гэта было раней, сёння іх калі і прывозяць, то вельмі мала і вельмі рэдка. Зазвычай - 10-15 пачкаў, а да нас звяртаецца людзей у 15 разоў больш. Гэта звязана з тым, што многія фірмы выкупляюць права на пэўную марку, і мы не маем права іх прывезці ў Беларусь без юрыдычнай згоды праваўладальніка на тэрыторыі мытнага саюзу. Зазвычай іх цяжка атрымаць задарма, а плаціць - вельмі дорага.

    - Вось і скончыліся некалькі гадзін Вашага дзяжурства пры тэлефоне і інтэрнэце. Было шмат аналагічных або аднолькавых пытанняў. Кс. Віталій, ці гатовы Вы былі адказаць на ўсе?
    Рэдакцыя
    - Я быў гатовы адказваць і на больш складаныя пытанні, бо на іх мне прыходзіцца адказваць вельмі часта. Пытанні задавалі звыклыя людзі, зацікаўленыя штодзённымі справамі. Я чакаў, што мяне запытаюць пра тое, якія праекты ажыццяўляе “Карытас”, што мы плануем зрабіць у будучым.

    - А сапраўды, якія праекты ажыццяўляе “Карытас”?
    - На сённяшні дзень, разам з рознымі рэгулярнымі акцыямі, такіх праектаў каля 30. Найважнейшыя з іх – гэта дзіцячы адпачынак летам, дапамога матэрыяльнымі сродкамі, акцыя Божага Нараджэння, “Кухня для бедных”.

    - Вялікі дзякуй за Ваш час. Спадзяёмся, што нашы чытачы яшчэ будуць мець магчымасць задаць Вам хвалюючыя іх пытанні.