Папа Францішак
    “Ламанне хлеба” стала іконай, распазнавальным знакам Хрыста і хрысціян. Давайце ўзгадаем Эмаус – Езуса пазналі “ў ламанні хлеба” (Лк 24, 35). Узгадаем першую суполь-насць у Ерузалеме: “Трывалі ў [...] ламанні хлеба” (Дз 2, 42). Эўхарыстыя з самага пачатку становіцца цэнтрам і формай жыцця Касцёла. Але давайце падумаем пра ўсіх святых мужчын і жанчын, вядомых і ананімных, якія аддавалі саміх сябе, уласнае жыццё, каб “накарміць” братоў. Колькі ж маці і колькі бацькаў разам з паўсядзённым хлебам, які ламаўся за хатнім сталом, аддавалі ўласныя сэрцы, каб выхаваць дзяцей, прытым добра выхаваць! Дзе яны знаходзяць сілу, каб рабіць гэта ўсё? Менавіта ў Эўхарыстыі, у моцы любові ўваскрослага Пана, які таксама і сёння ламае для нас хлеб і паўтарае: “Рабіце гэта на Маю памяць”.
        
Фрагмент гаміліі, прамоўленай падчас урачыстасці Божага Цела   †

---

Кс. абп Тадэвуш Кандрусевіч
   Успомнім казкі пра пошук скарбаў, якімі мы ў дзяцінстве зачытваліся. Чалавек, які хавае скарб, робіць гэта для таго, каб яго знайшоў не выпадковы чалавек, але толькі той, для каго ён схаваны. Падобна і Бог схаваў cкарб вечнага жыцця і паказаў нам, дзе яго знайсці: у Касцёле, дзе ў Эўхарыстыі б’ецца жывое сэрца Езуса. Таму на парозе касцёла Езус пытаецца ў нас: “Чалавек, навошта ты сюды прыйшоў? Проста заскочыў па дарозе? А можа, цябе чакае аперацыя ці экзамен? А можа, толькі гэты святар прамаўляе гаміліі, якія табе падабаюцца?”. Калі так, то на гэтым літургічным полі ты не знойдзеш шмат, бо размінаешся з самым каштоўным схаваным у ім скарбам, якім з’яўляецца Эўхарыстыя, у якой нас чакае любоў, што на дрэве крыжа збавіла нас і надалей ратуе. Падчас яе Езус ізноў аддае сваё жыццё за мяне і цябе. Імша – гэта не спектакль, а ахвяра і духоўны пір, у якім трэба ўмець прымаць актыўны ўдзел.

Фрагмент гаміліі, прамоўленай падчас урачыстасці Божага Цела

---

Кс. бп Аляксандр Яшэўскі SDB
   Мы ведаем, што любоў Боскага Збаўцы пакінула нам шмат дароў: хрост, праз які мы абмыліся ад грахоў і сталі дзецьмі Божымі; Евангелле, якое паказвае нам шлях да Нябеснага Валадарства; каштоўныя лекі споведзі, якія з нявольнікаў граху і сатаны робяць нас свабоднымі дзецьмі Божымі; дарагі нашаму сэрцу, святы і чысты Хрыстовы Касцёл, які вядзе нас шляхамі выратавання; любы намі Крыж, на якім Езус, Збаўца свету, адкупіў усіх. Але найкаштоўнейшы і найдаражэйшы за ўсё дар, які Езус пакінуў нам, – Найсвяцейшая Эўхарыстыя.

Фрагмент гаміліі, прамоўленай падчас урачыстасці Божага Цела