У 2013 годзе мы з мужам узялі шлюб. Вельмі хацелі мець дзяцей, але ўрачы паставілі дыягназ “бясплоддзе”. На працягу 5-ці гадоў я прымала гарманальныя прэпараты, шматлікія іншыя лекі... А потым кінула. Мы звярнуліся да Бога з просьбай адарыць наша сужэнства ласкай.

У лістападзе 2018 года з мужам упершыню трапілі на рэкалекцыі з малітвай аб дары патомства ў Росі, якія праводзіў кс. канонік Чэслаў Паўлюкевіч. Плён быў відавочны: нашы адносіны адчувальна змяніліся, мы сталі бліжэй адзін да аднаго. Шчаслівыя, з нецярплівасцю чакалі наступных рэкалекцый. †

У лютым 2019 года зноў паехалі ў Рось. Рэкалекцыі з малітвай аб ацаленні праводзіў кс. Віктар Ханько. Мы з мужам былі ў споведзі, асабіста размаўлялі са святаром. На вуснах застыла пытанне: “Не маем дзяцей… Як быць?”. Кс. Віктар адразу заўважыў, што вялізная адказнасць палягае на мужчыну. Неабходна адмовіцца ад нечага ў часе Вялікага посту, ахвяруючыся на карысць сваёй інтэнцыі.
    З Папяльцовай серады мы перасталі есці мяса, мучное, салодкае. Штодня гатавалі рыбу, гародніну, кашы, бульбу. Наведвалі святыню па нядзелях і ў святы, прымалі св. Камунію, удзельнічалі ў велікапосных набажэнствах. Просячы аб дары патомства для нас, малілася цётка мужа Ганна Якушава. Штодзень ранкам перад працай яна прыходзіла ў касцёл і ахвяравала св. Камунію за тое, каб у нас усё атрымалася. Вельмі ўдзячныя цётцы за заступніцкую малітву!
    У сакавіку яшчэ раз прыязджалі ў Рось на рэкалекцыі кс. Яна Рэчэка. Вельмі шмат з іх вынесла для сябе. Атрымала супакой у душы пасля смерці бацькі, падпусціла затоеныя боль і крыўду на яго. У канцы рэкалекцый аблівалася слязьмі: асэнсавала мінулае, у сэрцы прасіла прабачэння ў таты. Ведаю, ён прабачыў… У канцы месяца ездзіла ў Парэчча, удзельнічала ў Крыжовым шляху. Несла крыж на 13-ай стацыі “Езуса здымаюць з крыжа”… На наступны дзень убачыла сон, нібы падвозілі кс. Віктара, і ён сказаў, што ў нас з мужам будзе двое дзяцей.
    19 красавіка я адчула лёгкае галавакружэнне ў касцёле. 20 красавіка зрабіла тэст на цяжарнасць – дзве палоскі! Я даведалася аб гэтым напярэдадні Вялікадня! 25 красавіка здала аналіз на ХГЧ. Вынік ашаламіў – 5 тыдняў! Хвала Пану!
   23 снежня 2019 года нарадзілася наша дачка Валерыя. Мы бацькі… Нястомна дзякуем Богу за такую вялікую ласку. Яго міласэрнасць бязмежная!