“Малюся да Панны Марыі, каб заўсёды натхняла вас, дапамагала ў цяжкія моманты жыцця”.

16 верасня ў Соліне (Харватыя) адбылося біскупскае пасвячэнне новапрызначанага Апостальскага нунцыя ў Беларусі арцыбіскупа Антэ Ёзіча. Падчас урачыстасці іерарх звярнуўся са словамі прывітання да духавенства і вернікаў Касцёла ў Беларусі, які цяпер перажывае складаныя часы.
    Апостальскі нунцый паабяцаў сваё малітоўнае супрацоўніцтва для вырашэння ўсіх праблем краіны “з дапамогай міру, дыялогу і салідарнасці, пазбягаючы любога насілля”. “Малюся да Панны Марыі, каб заўсёды натхняла вас, дапамагала ў цяжкія моманты вашага жыцця”, – сказаў іерарх. †

Папа Францішак прызначыў арцыбіскупа Антэ Ёзіча Апостальскім нунцыем у Беларусі 21 мая. Ён змяніў на пасадзе венгерскага арцыбіскупа Габара Пінтэра, які быў скіраваны на дыпламатычную службу ў Гандурас.
    Біскупскае пасвячэнне Апостальскага нунцыя адбылося ў нядаўна пабудаваным санктуарыi Маці Божай Астраўной. Яго ўдзяліў Дзяржаўны Сакратар Яго Святасці папы Францішка кардынал П’етра Паралін.
   

Арцыбіскуп Антэ Ёзіч – другі харвацкі іерарх на пасадзе Апостальскага нунцыя ў Беларусі. У 2004–2011 гадах дыпламатычную місію Апостальскай Сталіцы ў краіне ўзначальваў арцыбіскуп Марцін Відавіч, які таксама належаў да Спліцка-Макарскай архідыяцэзіі.     Новы Апостальскі нунцый карыстаецца, акрамя роднай харвацкай, таксама італьянскай, англійскай, іспанскай, французскай, партугальскай, нямецкай, кітайскай, рускай і польскай мовамі.