За тыдзень Багародзіца ў сваіх цудадзейных абразах пераадолела больш за 2 500 кіламетраў, беручы пад сваю апеку беларускі народ.

12–18 чэрвеня адбылася аўтамабільная пілігрымка копій найбольш славутых сярод католікаў нашай краіны абразоў Багародзіцы. За гэты час яны пераадолелі больш за 2 500 кіламетраў. Пілігрымка распачалася і скончылася ў катэдральнай базіліцы св. Францішка Ксаверыя ў Гродне. †

Копіі абразоў з Будслава, Браслава, Брэста, Бялынічаў, Гродна, Гудагая, Лагішына і Тракеляў правезлі ўздоўж межаў Беларусі. Іх арыгіналы былі ў свой час каранаваны папскімі каронамі, што азначае прызнанне іх духоўнага значэння на нашай зямлі і за яе межамі.
   Малітоўная акцыя была арганізавана кс. канонікам Уладзіславам Завальнюком, пробашчам парафіі cв. Сымона і св. Алены ў Мінску (Чырвоны касцёл). Падчас пілігрымкі яе ўдзельнікі посцілі і маліліся за нашу краіну, за з’яднанне беларускага народа, хутчэйшае аднаўленне будслаўскага санктуарыя пасля пажару, за ўсіх жыхароў краіны і ўмацаванне міжканфесійнага міру.
    Пасля заканчэння пілігрымкі копіі абразоў Багародзіцы з васьмі беларускіх санктуарыяў на працягу некаторага часу заставаліся ў катэдральнай базіліцы ў Гродне, дзе іх маглі ўшаноўваць вернікі.