† Ватыкан. Святы Айцец перадаў украінскім бежанцам медыцынскія матэрыялы. Грузавы аўтамабіль з гуманітарнай дапамогай прыбыў з Рыма ў Львоў. Шпрыцы, пластыры, дэзінфікацыйныя сродкі і іншыя неабходныя рэчы даставіў у цэнтр збору гуманітарнай дапамогі пры ўкраінскай грэка-каталіцкай царкве св. Сафіі ў Рыме Апостальскі элемазінарый кардынал Конрад Краеўскі. У бліжэйшы час ва Украіну адправяцца таксама лекі і прадукты харчавання з Ватыкана. Апостальская элемазінарыя накіравала таксама фінансавыя сродкі для аказання дапамогі ахвярам вайны ў свае дыпламатычныя прадстаўніцтвы ў дзяржавах, куды скіроўваюцца бежанцы.

    † Англія. Восем біскупаў, якія прадстаўляюць каталіцкі епіскапат Англіі і Уэльса, скіравалі Міністру замежных спраў Вялікабрытаніі Элізабэт Трас падзяку за дапамогу Украіне і супрацьстаянне расійскай агрэсіі. “Канферэнцыя Каталіцкіх Біскупаў Англіі і Уэльса далучаецца да Касцёла ў Еўропе, заклікаючы міжнародную супольнасць дзейнічаць сумесна і рашуча, каб неадкладна спыніць вайну Расіі супраць Украіны і зрабіць усё магчымае для абароны нявінных мужчын, жанчын і дзяцей”, – заявілі іерархі ў пачатку ліста да кіраўніка брытанскага Міністэрства замежных спраў.
   
   † Германія. Вясновае пленарнае пасяджэнне Канферэнцыі Біскупаў Германіі пачалося з гарачага закліку да міру і асуджэння ваеннай агрэсіі Расіі супраць Украіны. Сітуацыя ва Украіне – адзін з цэнтральных пунктаў чатырохдзённай сустрэчы. Іерархі абмеркавалі гэтую тэму з экспертамі, найперш ў плане дапамогі бежанцам. Кіраўнік нямецкага епіскапату падзякаваў за шматлікія малітвы за мір і мірныя ініцыятывы ў Германіі. Ён запэўніў, што “гэтая верная салідарнасць у малітве працягнецца, пакуль не будзе пераадолены жах вайны”.
   
   † Польшча. У польскіх кінатэатрах адбылася прэм’ера першага фільма пра аб’яўленні ў Гвадэлупе. “Гэты фільм заклікае задумацца над якасцю нашай веры і паказвае, што нават у самых складаных сітуацыях Маці Божая з’яўляецца для чалавека асаблівай апорай”, – расказвае Пшэмыслаў Врэнзлевіч, дырэктар кракаўскага “Rafael Film”, які адказвае за пракат фільма “Гвадэлупскі цуд” у Польшчы. У фільме прадстаўлены падзеі 500-гадовай даўнасці. 12 снежня 1531 года Марыя з’явілася простаму ацтэку Хуану Дыега. Яна была апранута ў блакітны плашч і ружовую туніку, перавязаную чорнай стужкай, што для індзейцаў было выразным сігналам, што яна чакае дзіця.