Варта ведаць

•  У Кітаі з кастрычніка бягучага года арыштавана 12 святароў каталіцкага Касцёла, што дзейнічае ў падполлі, за іх душпастарскую і катэхетычную дзейнасць. Нядаўна былі арыштаваны два святары з правінцыі Хэбэй. Вернікі ж, якія ўдзельнічалі ў катэхезах, атрымалі штраф.
    •  У сталіцы В’етнама Ханоі 27 і 28 лістапада адбыўся Архідыяцэзіяльны кангрэс моладзі, на які прыбыло 20 тысяч католікаў, каб дзяліцца Евангеллем і верай. Дапамогай у гэтай падзеі паслужылі таксама розныя культурныя і артыстычныя падзеі. Італьянскае агенцтва ANSA падае, што мелі месца выпадкі, калі папа Францішак разам з арцыбіскупам Краеўскім, папскім адказным за міласціну, выходзіў на вуліцы Рыма, каб дапамагаць убогім.

Крос у Год веры
   Год веры адзначаецца па-рознаму. Падобным чынам было і ў Валенсіі (Іспанія), дзе мясцовая архідыяцэзія разам з Універсітэтам св. Вінцэнта Мучаніка арганізавалі крос. Удзел у гэтай падзеі прыняло звыш 4,5 тысяч чалавек, сярод якіх быў таксама мясцовы арцыбіскуп 68-гадовы Карлас Асоро.
    Траса “Volta a Peu” складала каля 6 кіламетраў. У кросе ўдзельнічалі таксама аматары спорту, цэлыя сем’і і выкладчыкі Універсітэта св. Вінцэнта Мучаніка. Арцыбіскуп Валенсіі, уручаючы медалі, сказаў, што найважнейшым з’яўляецца матыў, з якім людзі прымалі ўдзел у гэтым мерапрыемстве. Ён таксама падкрэсліў ахвярнасць, самаадданасць, працу ў групе і братэрскія ўзаемаадносіны, якія праяўляліся падчас гэтай падзеі.†

Ватыканскае радыё

Евангелізаваць Амазонію
   З 28 па 31 кастрычніка ў Манаусе (бразільскі штат Амазонас) адбывалася сустрэча на тэму евангелізацыі ў рэгіёне Амазоніі. Гэтую сустрэчу арганізавала Нацыя­нальная Канферэнцыя Біскупаў Бразіліі. Гэта першая такая падзея ў гісторыі мясцовага Касцёла.
    Падчас гэтай сустрэчы ўдзельнікі дыскутавалі на тэму грамадскіх, рэлігійных, палітычных, эканамічных і культурных рэалій гэтага рэгіёна. Стараліся таксама звярнуць увагу на ўклад каталіцкага Касцёла ў абарону жыцця і прамоцыю жыхароў Амазоніі. Кардынал Клаўдыа Хумес, старшыня камісіі епіскапата па справах Амазоніі, спытаўся: “Як мы сёння адказваем на заклікі Амазонніі?”. А таксама іерарх прыгадаў словы папы Францішка аб тым, што Амазонія з’яўляецца рашаючым экзаменам для будучыні Касцёла. Неабходна рызыкаваць і ісці наперад, бо інакш мы заблукаем. Амазонія займае 5 млн км² (61% усёй тэрыторыі Бразіліі), у гэтым рэгіёне жыве 24 мільёны чалавек.†

Ватыканскае радыё

Супраць сумлення
   Французскія мэры не маюць права адмовіць у заключэнні сужэнства асобам аднаго полу. Гэта абвясціла найвышэйшая судовая інстанцыя ў Францыі – Канстытуцыйная рада. У адказ на гэта 20 тысяч мэраў падпісалі петыцыю, у якой яны патрабуюць прадаставіць ім права дзейнічаць згодна з сумленнем. Такое права маюць, напрыклад, прадстаўнікі многіх іншых прафесій: урачы, адвакаты, суддзі. Міністр унутраных спраў адказаў, што за адмову ўдзяліць шлюб гомасексуальным парам мэрам пагражае 5 гадоў пазбаўлення свабоды і 75 тысяч еўра штрафу.
    Варта прыгадаць, што Прэзідэнт Франсуа Оланд раней абяцаў мэрам, што ніхто не будзе прымушаць іх удзельнічаць у заключэнні аднаполых шлюбаў. Аднак мэры не здаюцца і абяцаюць, што накіруюць петыцыю ў Еўрапейскі трыбунал па правах чалавека. †

Ватыканскае радыё