Суцяшае і аздараўляе Святы Дух атаясамліваецца з голубам, які з’явіўся падчас хрышчэння Езуса
ў водах Іардана. Так Ён прадстаўляецца на абразах у нашых святынях. Святы Дух з’яўляецца самай загадкавай Асобай Святой Тройцы, але Ён Бог і нястомна суправаджае нас на кожным кроку жыцця.
Чалавек у сваім жыцці ўвесь час нечага прагне. Прагне многіх рэчаў, патрэбных для паўсядзённага існавання, прагне здароўя, поспеху, Божага бласлаўлення, але перш за ўсё – любові. Калі гэтыя жаданні не могуць быць рэалізаваны па розных прычынах, тады з’яўляецца сум. Тым часам прышэсце Святога Духа задавальняе ўсе чалавечыя жаданні і прыносіць яму радасць.
З людскога досведу ведаем, што кожнаму з нас патрэбна вада: чалавеку, жывёле і расліне. Добра разумеем, што калі яе не хапае, прыходзіць смерць, бо ўсё вяне і губляе жыццё. Калі ж вады дастаткова, усё жыве: ад чалавека да жывёл і буйна квітнеючай расліннасці. Сілай свайго Духа Бог ацаляе гэтай жыватворнай вадой з Нябёсаў нашы сэрцы і лечыць іх ад усяго, што знішчыў у нас грэх, прыносячы з сабою духоўную смерць.
Урачыстасць Спаслання Святога Духа сёлета адзначаем у нядзелю 23 мая. |
|
Адкрывае на Бога З назіранняў вядома, што мудрасць і глупства пастаянна суправаджаюць чалавека. Дзіця набывае мудрасць з узростам, а, атрымліваючы веды і навучаючыся, робіць гэта для таго, каб лепш спраўляцца ў жыцці. Мы таксама ведаем, што адсутнасць дакладнага бачання навакольнага свету выклікае ў людзей, якіх закранула такая слепата, вялікія цяжкасці і дыскамфорт пры нармальным функцыянаванні. Тым часам Святы Дух, дадзены людзям як мудрасць, паляпшае наша бачанне Божых спраў.
Святы Дух патрэбны нам яшчэ для таго, каб маліцца ў еднасці з Марыяй і іншымі паслядоўнікамі Хрыста. Ён неабходны, каб смела вызнаваць сваю веру: “Езус наш Пан”, бо, ахрышчаныя адным Духам у сакраманце святога хросту, мы пакліканы сведчыць іншым пра Езуса Хрыста.
Аднак, перш за ўсё, Святы Дух нам патрэбны, каб у сваім паўсядзённым жыцці, часта адзначаным цяжкасцямі і пакутамі, перажыць сустрэчу з уваскрослым Панам, які ўлівае спакой у чалавечае сэрца.
Творца пасылае нас у моцы Святога Духа, як калісьці паслаў сваіх апосталаў: “Як паслаў Мяне Айцец, так і я пасылаю вас” (Ян 20, 21). Давайце возьмем на гэты шлях моц Святога Духа, якога Бог хоча нам удзяліць. Прымем дадзеную моц, бо толькі так мы зможам пражыць сваё жыццё з надзеяй і дзяліцца ёю з іншымі людзьмі, бо “надзея не асароміць, таму што любоў Божая вылілася ў сэрцы нашыя праз Святога Духа, які дадзены нам” (Рым 5, 5).